কৰোনা ভাইৰাছৰ ওপৰত এক সাক্ষ্যাৎকাৰ বৰ্ত্তমান সমগ্ৰ বিশ্বজুৰি কৰোনা ভাইৰাছে এক আতংকময় পৰিৱেশৰ সৃষ্টি কৰিছে। ইয়াৰ লগে লগে কিছুসংখ্যক অপপ্ৰচাৰকে ছচিয়েল মিদিয়াক আন আন কিছুমান মাধ্যমৰ জৰিয়তে ভুৱা প্ৰচাৰ চলাইছে, যিবিলাক WHO (বিশ্ব স্বাস্থ্য সংস্থা) এ কেতিয়া়ও শুদ্ধ বুলি গণ্য কৰা নাই। বিশ্ব স্বাস্থ্য সংস্থাই নিশ্বিত কৰিছে যে এই ৰোগৰ লগত কোনো ধৰণৰ দাগ বা চেকা লাগি নাথাকে। অৰ্থাৎ, এজন ব্যক্তি কৰোনা ভাইৰাছৰ দ্বাৰা আক্ৰান্ত হৈ সুস্থ হোৱাৰ পিছত তেওঁৰ দেহত কোনো ধৰণৰ দাগ ৰৈ নাযায়, কিন্তু ইয়াৰ পিছতো কিছুসংখ্যক অপপ্ৰচাৰকে ইয়াৰ বিপক্ষে গৈ মানুহৰ মাজত ভুৱা বাতৰি প্ৰকাশ কৰিছে যাৰ ফলত সমাজত কৰোনা ভাইৰাছৰ দ্বাৰা আক্ৰান্ত হৈ সুস্থ হোৱা ৰোগী, তেওঁৰ পৰিয়াল আৰু বন্ধুবৰ্গৰ সৈতে বৈষম্যমূলক আচৰণ কৰা পৰিলক্ষিত হৈছে। ইয়াৰ ফলত কৰোনা ভাইৰাছৰ দ্বাৰা আক্ৰান্ত হোৱা ৰোগীৰ সংস্পৰ্শ লৈ অহা ব্যক্তিসকলেও সমাজত নিজৰ সন্মান হানি হোৱাৰ ভয়ত কৰোনা পৰীক্ষা কৰোৱা নাই।

  এই সন্দৰ্ভত কৰোনা ভাইৰাছৰ যুদ্ধত প্ৰতক্ষ্যভাৱে যোগদান কৰা এগৰাকী ডিব্ৰুগড়ৰ স্বাস্থ্যকৰ্মী কিছু প্ৰশ্ন সোধাত তেওঁ কয়-

১) কিছুমান অপপ্ৰচাৰকে কৈছে, এবাৰ কৰোনা ভাইৰাছৰ দ্বাৰা আক্ৰান্ত হ’লে তেওঁৰ গাত দাগ ৰৈ যায়, এয়া সচাঁনে?

নহয়, ই সম্পূৰ্ণভাৱে মিছা। এই ৰোগৰ দ্বাৰা আক্ৰান্ত ৰোগীৰ দেহত কোনো ধৰণৰ দাগ ৰৈ নাযায়। বৰঞ্চ, এবাৰ সুস্থ হোৱাৰ পিছত তেওঁ সম্পূৰ্ণৰূপে সুস্থ হৈ পৰে।

২) কিছুমানে কৈছে, ৰ’দ ল’লে বা ২৫⁰ চেলচিয়াছ উষ্ণতাত থাকিলে কৰোনা ভাইৰাছ প্ৰতিৰোধ কৰিব পাৰি, আপুনি কি কয়?

নহয়, সম্পূৰ্ণভাৱে মিছা। কিয়নো বহুতো গৰম উষ্ণতাত থকা দেশেও কৰোনা ভাইৰাছৰ দ্বাৰা আক্ৰান্ত হৈছে। কৰোনা ভাইৰাছৰ পৰা হাত সাৰিবলৈ এক মাত্ৰ উপায়সমূহ হ’ল নিজকে ঘৰৰ ভিতৰত আবদ্ধ কৰি ৰখা, সঘনাই হাত দুখন চাবোনেৰে ধোৱা, চেনিটাইজাৰ ব্যৱহাৰ কৰা আৰু সামাজিক দূৰত্ব বজাই ৰখা।

৩) কৰোনা ভাইৰাছ ম’হ মাখি আদিৰ দ্বাৰা সংক্ৰমণ হ’ব পাৰে নেকি?

এতিয়ালৈকে বিশ্ব স্বাস্থ্য সংস্থাই এনে বিষয়ত কোনো ধৰণৰ সিদ্ধান্ত দিয়া নাই।

৪) বৰ্ত্তমানলৈকে কৰোনা ভাইৰাছৰ ঔষধ ওলাইছে নেকি আৰু হাইড্ৰক্সীক্লৰ’কুইন কৰোনাৰ প্ৰতিষেধক হয় নেকি?

বৰ্ত্তমানলৈ কৰোনা ভাইৰাছৰ কোনো ধৰণৰ প্ৰতিষেধক ওলোৱা নাই, ইয়াৰ পৰীক্ষা চলি আছে। হাইড্ৰক্সীক্লৰ’কুইন কৰোনাৰ প্ৰতিষেধক হয় বুলি কোনো প্ৰমাণ নাই। তদুপৰি হাইড্ৰক্সীক্লৰ’কুইন অত্যাধিক সেৱন কৰিলে ৰোগী বেলেগ ৰোগত আক্ৰান্ত হৈ মৃত্যুমুখত পৰিব পাৰে।

৫) জালুকৰ চুপ খাই কৰোনা ভাইৰাছ প্ৰতিৰোধ কৰিব পৰা যায়নে?

জালুকৰ চুপেৰে কৰোনা ভাইৰাছ প্ৰতিৰোধ কৰিব পৰা যায় নে নাযায় সেয়া সেয়া এতিয়ালৈ প্ৰমাণিত হোৱা নাই। বৰ্ত্তমান আমি আমাৰ দেহৰ ৰোগ প্ৰতিৰোধ ক্ষমতা বজাই ৰাখিবৰ বাবে আমাৰ খাদ্যাভ্যাস ভালে ৰাখিব লাগে, পানী বেছিকৈ খাব লাগে আৰু যোগাসন কৰিব লাগে।

৬) শুনিবলৈ পোৱা গৈছে, যদি কোনো ব্যক্তিয়ে দহ ছেকেণ্ডৰ বাবে উশাহ ৰখাই থব পাৰে, তেন্তে তেওঁ কৰোনা ভাইৰাছৰ পৰা মুক্ত, এইয়া সচাঁনে?

=> ইয়াৰ কোনো ভিত্তি নাই।

৭) কৰোনা ভাইৰাছৰ পৰীক্ষা কৰাৰ ক্ষেত্ৰত থাৰ্মেল স্কেনাৰ কিমান দূৰ ফলপ্রসূ?

=> কৰোনা ভাইৰাছৰ পৰীক্ষা কৰাৰ ক্ষেত্রত থাৰ্মেল স্কেনাৰ ফলপ্রসূ, যদিহে যাৰ পৰীক্ষা কৰা হয় তেওঁৰ জ্বৰ থাকে। কিন্তু কৰোনা ভাইৰাছৰ দ্বাৰা আক্রান্ত হোৱাৰ পিছতো যি সকল ব্যক্তিৰ কোনো ধৰণৰ লক্ষণে দেখা দিয়া নাই, তেনে ব্যক্তিৰ ক্ষেত্রত ফলপ্রসূ নহয়।

৮)এন্টিবায়টিক্স কৰোনা ভাইৰাছৰ প্ৰতিষেধক হ'ব পাৰে নে?

=> এন্টিবায়টিক্স কোনোপধ্যেই কৰোনা ভাইৰাছৰ প্ৰতিষেধক হ'ব নোৱাৰে কিয়নো এন্টিবায়টিক্সত কেৱল বেক্টেৰিয়া নাশ কৰাৰ শক্তি হে থাকে।

৯) কৰোনা ভাইৰাছৰ দ্বাৰা অকল বৃদ্ধ লোক সকল আক্রান্ত হয় নেকি?

=> নহয়, কৰোনা ভাইৰাছ অকল বৃদ্ধ লোকৰ নহয়, সকলো বয়সৰ লোককেই হ'ব পাৰে। কিন্তু বৃদ্ধ ব্যক্তি সকলৰ ক্ষেত্রত এই ৰোগৰ সংক্ৰমণ অত্যাধিক হয় কিয়নো তেওঁলোকৰ ৰোগ প্ৰতিৰোধৰ ক্ষমতা কম বয়সীয়া লোক সকলতকৈ তুলনামূলক ভাবে কম।

 এই সাক্ষাৎকাৰৰ পৰা আমি এটা কথা জানিব পাৰিছো যে কৰোনা ভাইৰাছৰ কোনোধৰণৰ প্ৰতিষেধক এতিয়ালৈ ওলোৱা নাই। গতিকে আমি সকলোৱে বিশ্ব স্বাস্থ্য সংস্থাই দিয়া পৰামৰ্শ মানি নিজকে ঘৰৰ ভিতৰত আৱদ্ধ কৰি, সঘনাই চাবোন বা চেনিটাইজাৰেৰে নিজৰ হাত দুখন পৰিস্কাৰ কৰি, সামাজিক দূৰত্ব বজাই ৰাখি কৰোনা ভাইৰাছৰ পৰা নিজকে তথা নিজৰ পৰিয়াল আৰু সমাজক সুৰক্ষিত কৰিব পাৰিম।