আজিৰ শিশু দেশৰ ভৱিষ্যত নাগৰিক। সেয়ে সকলোৱে বিচাৰে দেশৰ শিশু সকল সুস্বাস্থ্যৰ গৰাকী হোৱাটো। প্ৰতিজন পিতৃ মাতৃৰ কাম্য হয় যে তেওঁলোকৰ সন্তানটি সুস্থ সবল হৈ সম্পদ হিচাপে গঢ় লৈ উঠাটো। কিন্তু সাম্প্ৰতিক সময়ত শিশু সকলৰ স্বাস্থ্য ৰ প্ৰতি বহু ভাবুকি অহা দেখা যায়। এই ভাবুকি সমূহৰ ভিতৰত মেদবহুলতা অন্যতম। আমাৰ দেশৰ শিশু সকল দ্ৰুতগতিত মেদবহুলতাৰ সমস্যাত ভোগা দেখা গৈছে।

মেদবহুলতা মানে হৈছে শৰীৰত অতিৰিক্ত চৰ্বি জমা হোৱা। এই অতিৰিক্ত চৰ্বি জমা হোৱাৰ ফলত শিশু সকলৰ ওজন জোখতকৈ অধিক বৃদ্ধি হোৱা দেখা গৈছে। এক সমীক্ষা মতে জানিব পোৱা গৈছে যে এজন শিশুৰ উচ্চতাৰ শিশুতকৈ ২০শতাংশ বেছি শৰীৰৰ ওজন বা ল’ৰাৰ ২৫ শতাংশ আৰু ছোৱালীৰ ক্ষেত্ৰত ৩২ শতাংশ অতিৰিক্ত চৰ্বি জমা হলেই শিশুসকল মেদবহুলতাত ভুগিছে বুলি ধৰা হয়।

মেদবহুলতাৰ কাৰণ বহুত আছে। তাৰে কিছুমান প্ৰাকৃতিক আৰু কিছুমান নিজেই সৃষ্টি কৰা। যি শিশুৱে লগাত কৈ বেছিকৈ কেলৰি যুক্ত খাদ্য গ্ৰহণ কৰে তেন্তে শিশুৰ সহজে ওজন বৃদ্ধি হয়। মেদবহুলতা কাৰণ বংশগত হোৱাও দেখা যায়। পিতৃ মাতৃৰ বা আন পৰিয়ালৰ লোক যদি মেদবহুলতাৰ ভোগা হয় তেন্তে শিশুটিও এই সমস্যাত ভোগা দেখা যায়।

বৰ্তমান সময়ত শিশু সকলে পুষ্টিকৰ খাদ্য অৰ্থাৎ ফল-মূল, সেউজীয়া শাক-পাচলি এইসমূহ গ্রহণ নকৰি বিভিন্ন ফাষ্টফুডৰ প্ৰতি বেছি আকৰ্ষিত হোৱাৰ ফলত দেহত চৰ্বী অধিক পৰিমাণে বৃদ্ধি পাইছে। কাৰণ ফাষ্টফুড জাতীয় খাদ্যত উচ্চ মানৰ চৰ্বি মজুত থাকে। শিশু সকলৰ মাজত ফাষ্টফুডৰ অধিক জনপ্ৰিয়তাই শিশু সকল দ্ৰুত গতিত মেদবহুলতাত ভুগিব লগা হৈছে।

আন এটি প্ৰধান কাৰণ হৈছে পৰিশ্ৰম বিহীন জীৱন যাপন কৰা। বৰ্তমান শিশু সকলে কোনো ঘৰুৱা কৰ্ম কৰা পৰিলক্ষিত নহয়। কেৱল মোবাইল, লেপটপ, ভিডিও গেম আদিৰ মাজতে সময় কটোৱা দেখা যায়। ইয়াৰ বাবে শিশু সকলৰ শৰীৰত চৰ্বি খিনি কমিবলৈ কোনো সুবিধা নাপাই। শিশু সকলে বিভিন্ন শৰীৰ চৰ্চা নকৰে। বিভিন্ন খেল-ধেমালি যেনে- দৌৰ, কাবাদী, আদি খেল সমূহ খেলা দেখা নাযায় কেৱল ভিডিও গেমৰ মাজতে আবদ্ধ হৈ থকাৰ ফলত শৰীৰ সঞ্চালন হ’বলৈ নাপাই মেদবহুলতাত ভোগা দেখা গৈছে।

এই ক্ষেত্ৰত অভিভাৱক সকলেও কিছুমান পদক্ষেপ লোৱা উচিত তেওঁলোকৰ শিশু সকলৰ সুস্বাস্থ্যৰ বাবে। শিশু সকলক ফাষ্টফুড জাতীয় খাদ্য খোৱাৰ পৰা অব্যাহত ৰখাৰ চেষ্ঠা কৰিব লাগে, বিভিন্ন খেল-ধেমালি খেলাত উৎসাহ জনাব লাগে, এনে কৰিলে শিশু সকল মেদবহুলতাৰ সমস্যাৰ পৰা মুক্ত হব পাৰিব। এজন সুস্থ সবল শিশু গঢ় দিয়াত আমি সকলোৱে অৰিহণা যোগাও আহক।