ডিব্ৰুগড় জিলাৰ অন্তৰ্গত জামিৰা চাহ বাগিছাৰ ববিতা তুৰী নৱম শ্ৰেণীত পঢ়ি থকা এগৰাকী ছাত্ৰী আৰু লগতে এবিতা ইউনিচেফৰ (ABITA-UNICEF) কিশোৰী গোটৰ এগৰাকী নিয়মীয়া সদস্যা। ববিতাহঁতৰ কিশোৰী গোটৰ সাপ্তাহিক আলোচনাত বিভিন্ন বিষয়ৰ ওপৰত আলোচনা কৰা হয়। ক্লাবলে আহি পৰিপুষ্টিৰ ওপৰত ববিতাই যথেষ্ট কথা শিকিবলৈ পাইছে। তাই কয়, “আগতে মই শুকানকৈ ভাত আৰু ৰুটি খাইছিলো। দাইল, শাক-পাচলি কমকৈ খোৱা হৈছিল বা খাব মন যোৱা নাছিল। কিন্তু যেতিয়া ক্লাবত আমাক এফ.এফ.এল ভিডিও সমূহ দেখুৱালে, তেতিয়াহে বুজি পালো যে আমাৰ খাদ্য সমূহৰ ক’ত কি ভিটামিন থাকে আৰু এই ভিটামিন সমূহৰ অভাৱ হ’লে আমাৰ দেহত দেখা দিব পৰা সমস্যা, যেনে- এনিমিয়া, কুকুৰিকণা, পয়া লগা ইত্যাদি ৰোগৰ ভয়াৱহতাৰ বিষয়েও জানিব পাৰিলো।” ববিতাই লগতে আমাক কয়, আমি ভাতৰ পৰা কাৰ্বহাইড্ৰেট, শাক-পাচলিৰ পৰা ভিটামিন, দাইলৰ পৰা প্ৰটিন পাওঁ। আমাৰ খোৱা থালিখনৰ খাদ্যসমূহ ত্ৰি-ৰঙৰ হ’লেহে আমি আমাৰ আহাৰৰ পৰা সম্পূৰ্ণ পুষ্টি পাওঁ। এই সমূহৰ লগতে আমি প্ৰ’টিন, কেলচিয়াম, আইৰণ আদি আমাৰ শৰীৰে সময়ে সময়ে পায় থাকিবলে মাছ, মাংস, কণী, গাখীৰ ইত্যাদি খায় থাকিব লাগে। তাৰোপৰি আমি খোৱা খাদ্যৰ পৰা যাতে আমি আইৰণ ভালদৰে পাওঁ তাৰবাবে খাদ্যৰ লগত ভিটামিন চি খাব লাগে। ভিটামিন চি আমি টেঙাজাতীয় শাক-পাচলি, ফল-মূল আদিৰ পৰা পাওঁ। এই কথা সমূহ জানিব পোৱাৰ পাছৰ পৰাই ববিতাই শাক পাচলি খোৱাৰ ওপৰত গুৰুত্ব দিব ধৰিলে আৰু লগতে তাইৰ পৰিয়ালৰ অন্যান্য সদস্য সকলকো ভিটামিন যুক্ত খাদ্য খালে হোৱা উপকাৰিতাৰ কথা বুজালে। ববিতাই লগতে আৰু কয় যে, “আগতে প্ৰায়ে মোৰ গা-বেয়া হৈ থাকিছিল, পেটৰ বিষ হৈ থাকিছিল, যেতিয়াৰ পৰা মোৰ খাদ্যভ্যাস সলনি কৰিব ধৰিলো তেতিয়াৰ পৰা এই সমস্যা সমূহ লাহে লাহে নোহোৱা হ’ব ধৰিলে। এতিয়া মোৰ লগতে মোৰ ঘৰৰ অন্যান্য সদস্য সকলেও পুষ্টিকৰ খাদ্য খোৱাত গুৰুত্ব দিয়ে।