বৰ্তমানৰ জলবায়ু পৰিৱৰ্তন

 বৰ্তমান পৰিৱেশৰ যিবোৰ সমস্যাই মানহৰ লগতে জীৱ-জগতৰ ব্যাপক ক্ষতিসাধন কৰিবলৈ লৈছে, সেই সমস্যা সমূহৰ ভিতৰত জলবায়ু পৰিৱৰ্তনক প্ৰথম স্থানত ৰাখিব পাৰি। জলবায়ু পৰিৱৰ্তন সমগ্ৰ বিশ্বৰ বাবে এক জলন্ত সমস্যা হৈ পৰাৰ লগে লগে অসমতো ইয়াৰ প্ৰভাৱ দেখা পোৱা গৈছে।

 সাধাৰণতে, জলবায়ু পৰিৱৰ্তনৰ প্ৰধান কাৰণসমূহ হৈছে- সূৰ্য্যৰ তাপ আৰু পোহৰৰ বিকিৰণৰ মাত্ৰাৰ সালসলনি, ভূ-গৰ্ভৰ টেক্টনিক প্লেটৰ স্থানান্তৰ, আগ্নেয়গিৰী উদগীৰণ ইত্যাদি প্ৰাকৃতিক কাৰণত হয় যদিও বৰ্তমান মানৱসৃষ্ট কাৰণসমূহৰ বাবে ই অধিক খৰটকীয়া হ’বলৈ ধৰিছে। মানৱসৃষ্ট কাৰণসমূহৰ ভিতৰত বনাঞ্চল ধংস, বিভিন্ন ইন্ধন দহন, কৃষি ক্ষেত্ৰত কীটনাশক আৰু ৰাসায়নিক সাৰৰ প্ৰয়োগ, মানুহৰ বিলাসী জীৱন-যাপন আদিয়া প্ৰধান হৈ পৰিছে। FOREST COVER MATRIX 2011 ৰ এক এক সমীক্ষাত কোৱা হৈছে যে অসমত এটা দশকত গঢ়ে প্ৰায় ১৭ বৰ্গ কিলোমিটাৰ মধ্যমীয়া বনাঞ্চল হ্ৰাস পায় আহিছে। অসমত য়োৱা চাৰি-পাঁচ বছৰে চাৰি লেণ্ড যুক্ত ৰাস্তা নিৰ্মানৰ বাবে যথেষ্ট গছ-গছনি কাটি পোলোৱা হৈছে। ইয়াৰ সমান্তৰালকৈ ক্ষুদ্ৰ চাহ বাগানসমূহৰ বৃদ্ধিৰ লগে লগে বিভিন্ন চাহপাত উদ্যোগ আৰু ইটা ভাটা সমূহ গঢ় লৈ উঠা দেখিবলৈ পোৱা গৈছে, যাৰ ফলত অসমৰ জলবায়ু পৰিৱৰ্তন দ্ৰুত হোৱা পৰিলক্ষিত হৈছে।

জলবায়ু পৰিৱৰ্তনৰ মানৱসৃষ্ট কাৰণসমূহৰ বাবে বায়ুমণ্ডলত কাৰ্বন-ডাই-অক্সাইড, মিথেন নাইট্ৰাছ-অক্সাইড, চি.এফ.চি, আদিৰ দৰে সেউজগৃহ গেছবোৰ বৃদ্ধি হৈ গোলকীয় উষ্ণতা বৃদ্ধি কৰিছে। যাৰ ফলত শাত আৰু গ্ৰীষ্ম, খৰাং আৰু প্ৰৱল বৃষ্টিপাতৰ প্ৰাবল্য বৃদ্ধি পাইছে। অসমতো এইধৰণৰ জলবায়ুৰ নাটকীয় পৰিৱৰ্তন দেখিবলৈ পোৱা গৈছে। মৌচুমী আগমনৰ লগে লগে প্ৰৱল বৃষ্টিপাতৰ বাবে বানপানীৰ সৃষ্টি হয় আৰু তাৰ বিপৰীতে কোনো সময়ত অতি খৰাং হোৱা দেখিবলৈ পোৱা গৈছে। যাৰ ফলত অসমৰ কৃষি-জীৱি লোকসকল বিপৰ্যয়ৰ সম্মুখীন হোৱা দেখা পোৱা গৈছে।

 CENTRE FOR ENVIRON, SOCIAL, AND POLICY RESEARCH (CESPR) য়ে চলোৱা এক সমীক্ষা অনুসৰি অসমৰ ক্ৰমে লক্ষীমপুৰ, যোৰহাট, মাজুলী, মৰিগাওঁ, শোণিতপুৰ, ডিব্ৰুগড় জিলাত জলবায়ু পৰিৱৰ্তন সৃষ্টি কৰা প্ৰকৃতিক বিপৰ্যয়ে অসমৰ পিছ পৰা জনগোষ্ঠীসমূহৰ লাখ লাখ মানুহৰ জীৱনলৈ অমানিশা নমাই আনিছে। বিভিন্ন ঠাইত এচিড বৰষুন হোৱাৰ ফলত বন-বননি ধংস হোৱাৰ ফলত জীৱ জন্তুবোৰ জনবসতি অঞ্চললৈ ওলাই আহিছে। জলবায়ু পৰিৱৰ্তনে মানৱ সমাজত অতি মাত্ৰা ক্ষতি সাধন কৰিছে। যাৰ ফলত মানৱ সমাজত বিভিন্ন ধৰণৰ সমস্যাৰ সম্মুখীন হ’বলগীয়া হৈছে।

নাম- নমিতা বাগ
ব্ৰক্ষ্মাজান চাহ বাগিছা

এইখন আমাৰ দেশ

এইখন আমাৰ দেশ, আপোন আপোন লাগে
আমাৰ দেশ বুকুত আছে,
বহুতো জাতি-উপজাতি একেলগে থাকো
আমি মনৰ কথা পাতি।
এইখন আমাৰ দেশ, দেখিবলৈ ধুনীয়া
সুখ, দুখ, মৰম, চেনেহৰ মাজেৰে
আমি সকলোৰে সৈতে থাকি ভাল পাওঁ
আমাৰ ভাষা শুনিবলৈ সুৰীয়া
ক’বলৈ বৰ মিঠা
এইখন আমাৰ দেশ, আপোন আপোন লাগে
জীয়াই থকাৰ সপোন আমি
দেখো যুগে যুগে।

নাম- চনিয়া হাঁছা
বয়স- ১৬ বছৰ
বগপৰা চাহ বাগিচা
জিলা- জিব্ৰুগড় (বি.চি.পি)

জলবায়ু পৰিৱৰ্তন সম্পৰ্কীয় সভা

 জলবায়ু পৰিৱৰ্তনৰ ফলত পৰা প্ৰভাৱ সম্পৰ্কীয় এখন সভা আদৰ্শ বৰবাৰী গাৱঁৰ প্ৰাৰ্থমিক বিদ্যালয়ৰ প্ৰাঙ্গনত অনুষ্ঠিত হয় । সুকুমাৰ মইনা পাৰিজাতৰ মইনাসকল আৰু অভিভাৱকৰ উপস্থিতিত কেবাজনো অভিজ্ঞ ব্যক্তিয়ে ভাষণ প্ৰদান কৰে জেষ্ঠ নাগৰিক, অবসৰপ্ৰাপ্ত শিক্ষক পদ্মধৰ শইকীয়া দেৱে শৈশৱ কালৰ পৰা দেখি অহা প্ৰাকৃতিক পৰিবেশত জলবায়ু প্ৰভাৱ প্ৰত্যক্ষ ভাবে পৰিছে তাক নুই কৰিব নোৱাৰি বুলি বক্তব্য ৰাখে। জলবায়ু পৰিৱৰ্তনৰ ফলত প্ৰতিবছৰে অধিক উত্তাপ আৰু শীতৰ প্ৰকোপ বৃদ্ধি দেখিবলৈ পোৱা দেখা গৈছে। পৃথিৱীৰ বৃহত্তম নদী দ্বীপ মাজুলীত যি সময়ত বৃহৎ আকাৰৰ ভূমি আছিল শস্য-শ্যামলা, মাছ, গাখীৰ উভৈনদী আছিল আজি সেই খিনি দুৰ্লভ হৈছে ইয়াৰ মূল কাৰণ জলবায়ু পৰিবৰ্তন। অতি বৃষ্টি ৰ ফলত প্ৰতিবছৰে হোৱা বান পানীয়ে নদীৰ গতিপথ সলনি গড়াখহনীয়া সৃষ্টি কৰি জনজীৱনত প্ৰভাৱ পেলাইছে। জধে মধে গছ-গছনি ধ্বংস, ভূমি খনন অপৰিকল্পিত ভাবে গঢ়ি উঠা ইটা ভটা ডাঙৰ উদ্যোগৰ নিষ্কাষিত ধোৱাইও জলবায়ু প্ৰভাৱৰ কাৰণ। "সুকুমাৰ মইনা পাৰিজাতৰ" সম্পাদক যাদৱ বৰাই শিশু সকলক জন্ম দিনটোত একোটাকৈ গছপুলি ৰুবৰ বাবে আহ্বান জনাই ।

নাম- কুলদ্বীপ নাৰায়ণ বৰা
জিলা- মাজুলী

নামৰূপত ইক' ক্লাবৰ প্ৰশংসনীয় পদক্ষেপ

 নামৰূপৰ ব্ৰহ্মপুত্ৰ ভেলী সাৰনিগম মডেল উচ্চতৰ মাধ্যমিক বিদ্যালয়ে ৩ জানুৱাৰী, ২০২০ ত লোৱা এক প্ৰশংসনীয় পদক্ষেপৰ বাবে নামৰূপ আৰু ইয়াৰ দাঁতি-কাষৰীয়া ৰাইজৰ দৃষ্টি আকৰ্ষণ কৰিছে। বিদ্যালয়ৰ পঞ্চমৰ পৰা নৱম শ্ৰেণীৰ ছাত্ৰ-ছাত্ৰীসকলক সামৰি গঠন কৰা ইক' ক্লাবে বিদ্যালয় চৌহদৰ ভিতৰত আৰু বাহিৰত প্ৰায় অৰ্ধসহস্ৰাধিক বিভিন্ন ফল-মূলৰ গছৰ পুলি ৰোপণ কৰে। অনুষ্ঠানটি শুভাৰম্ভ কৰে বিদ্যালয়ৰ প্ৰধান শিক্ষয়িত্ৰীগৰাকীয়ে। তেখেতে ভাষণ প্ৰসংগত ফল-মূল গছ ৰোপণৰ উপকাৰিতাৰ বিষয়ে বহলাই ব্যাখ্যা কৰে। ইয়াৰ পাছত ছাত্ৰ-ছাত্ৰীসকলৰ মাজত গছ-পুলি বিতৰণ কৰি পুলিসমূহ চোৱা-চিতাৰ দায়িত্ব নিজৰ-নিজৰ বুলি শপত বাক্য পাঠ কৰায়। ৰোপণ কৰা গছবোৰৰ চাৰিওফালে বাঁহৰ বেৰাও দিয়া হয়। বেৰা দিবলৈ শিকোৱা কাৰ্য্যলৈ ইক'ক্লাবৰ সদস্যসকল বহু উৎসাহী হৈ পৰে।

 পৰিৱেশৰ প্ৰতি জনসাধাৰণৰ মাজত সচেতনতা আনিবৰ বাবে ইক' ক্লাবে প্ৰত্যেক বছৰে বিশ্ব পৰিৱেশ দিৱস আৰু এই অনুষ্ঠানটিৰ প্ৰতিষ্ঠা দিৱসত ৰেলীৰ আয়োজন কৰে। যোৱা দূই বছৰ তেখেতলোকে নৱম শ্ৰেণীৰ ছাত্ৰ-ছাত্ৰীসকলৰ প্ৰত্যেককে এটা-এটা গছপুলি দি সকলোকে নিজৰ গছপুলিটোৰ চোৱা-চিতা কৰি গছজোপাই ঠন ধৰিলে তাৰ ফটো তুলি বিদ্যালয়ৰ ই-মেইলত প্ৰেৰণ কৰাটো বাধ্যতামূলক কৰি দিছিল। অৱশ্যে এইবছৰ কৰোনা অতিমাৰীৰ আতংকৰ বাবে এইবাৰ গছপুলি বিতৰণ কৰিব নোৱাৰিলে।

নাম- অন্তৰীক্ষা চেতিয়া
জিলা- ডিব্ৰুগড়

গছপুলি ৰোপন আৰু স্বচ্ছতা কাৰ্য্যসূচী

  ইউনিচেফ, কৃষ্ণকান্ত সন্দিকৈ মুক্ত বিশ্ববিদ্যালয় অসম আৰু সদৌ অসম মইনা পাৰিজাতৰ যৌথ উদ্যোগত অসমত ৰূপায়ন হৈ থকা যুৱ সাংবাদিক যোগাযোগ কাৰ্য্যসুচীৰ অন্তৰ্গত মাজুলী জিলাৰ যুৱ সাংবাদিক সকলৰ দ্বাৰা চাফাই আৰু গছপুলি ৰোপনৰ লগতে এখনি সজাগতা সভা ১১ অক্টোবৰত পূৱ মাজুলী মহাবিদ্যালয়ৰ প্ৰাংগনত ৰূপায়ন কৰা হয়। ৰাৱনাপাৰ আঞ্চলিক মইনা পাৰিজাতৰ মইনা, বিষয়ববীয়া তথা জ্ঞানজ্যোতি শাখা মইনা পাৰিজাত, মূদিগাৱঁৰ সমূহ মইনা, পৰিচালক-পৰিচালিকা, অভিভাৱক-অভিভাৱিকাই সহযোগিতা আগবঢ়োৱা কাৰ্য্যসূচীটোত পুৱা ৮-৩০ বজাত মহাবিদ্যালয়ত সমবেত হৈ ক’ভিড-১৯ ৰ বাবে বন্ধ হৈ থকা মহাবিদ্যালয় খনিৰ চৌহদটি সকলোৱে ঝাৰু লৈ পৰিস্কাৰ কৰে। মাজুলী জিলা মইনা পাৰিজাতৰ সভাপতি শ্ৰীযুত লোহিত বৰাই এটি শুভেচ্ছামূলক বক্তৃতা প্ৰদান কৰি কাৰয্যসূচীৰ শুভাৰম্ভ কৰে। অনুষ্ঠানটিত মইনা, যুৱ সাংবাদিক, পৰিচালক-পৰিচালিকা, অভিভাৱক-অভিভাৱক সহ প্ৰায় ১১০ গৰাকী ব্যক্তি উপস্থিত থাকি সহযোগিতা আগবঢ়ায়। সকলোৱে মুখত মাস্ক পৰিদান কৰি, সামাজিক দূৰত্ব বজাই ৰাখি কাৰ্য্যসূচীত ভাগ লয়।

 চাফাইৰ অন্তত যুৱ সাংবাদিক সকলৰ দ্বাৰাই মহাবিদ্যালয় প্ৰাংগনত গছপুলি ৰোপনৰ কাৰ্য্যসূচী হাতত লোৱা হয়। মহাবিদ্য়ালয় খনিৰ অধ্যক্ষ ড⁰ অৰুপ বৰাদেৱে এটি নাৰিকলৰ পুলি ৰোপন কৰি কাৰ্য্যসূচী খনৰ শুভাৰম্ভ কৰে। ইয়াৰ পিছতেই যুৱ সাংবাদিক আৰু মইনা সকলৰ দ্বাৰা মহাবিদ্যালয় প্ৰাংগনত লিচু, মধুৰিআম, বকুল, জামু, কঠাল ইত্যাদি গছপুলি ৰোপন কৰাৰ লগতে বেৰাৰ ব্যৱস্থাও কৰা হয়।

 গছপুলি ৰোপনৰ পিছত সেই ঠাইতে এখনি সজাগতামূলক সভা অনুষ্ঠিত হয়। যুৱ সাংবাদিক, বিদিশা শইকীয়াই আঁত ধৰা সভাখনিত স্বচ্ছতা আৰু গছপুলি ৰোপনৰ প্ৰয়োজনীয়তা সম্পৰ্কে বক্তৃতা আগবঢ়ায়। যুৱ সাংবাদিক উপাসনা দত্ত, মাধবী শইকীয়া, স্বাগতা শইকীয়া আৰু চিন্ময় শইকীয়াই। সেউজ গৃহ প্ৰভাৱ, গ্লবেল ৱাৰ্মিং অৰ্থাৎ গোলকীকৰণৰ পৰা হাত সাৰিবলৈ একমাত্ৰ উপায় গছপুলি ৰোপন কৰি প্ৰকৃতি সেউজীয়া কৰা। সভাত স্বচ্ছতাৰ প্ৰয়োজনীয়তা সম্পৰ্কে বক্তব্য আগবঢ়ায় শ্ৰী জগত হাজৰিকা, প্ৰবীন ভূঞা, ভোগেশ্বৰ শইকীয়া, লোহিত শইকীয়া আৰু সঞ্জীৱ দত্তই। মাজুলী জিলা পৰিষদৰ সদস্য শ্ৰীযুত কমল চন্দ্ৰ তামুলী প্ৰমূল্যে বহু কেইগৰাকী বিসিষ্ট ব্যক্তি উপস্থিত থকা সভাখনিত যুৱ সাংবাদিক সকলে ৰূপায়ন কৰা কাৰ্য্যসূচীৰ শলাগ লোৱাৰ লগতে ধাৰাবাহিক ভাবে এনে কাৰ্য্যসূচী গ্ৰহণ কৰিবৰ বাবে আহ্বান জনায়।

নাম- স্বাগতা শইকীয়া
জিলা- মাজুলী